Entrapment operation vs mga drayber legal, ingon sa Citom

Ang "entrapment operation" nga gipatuman sa mga traffic enforcer batok sa mga malapasong drayber usa ka "legal" nga pamaagi matud pa ni Executive Director Arnel Tancinco sa City Traffic Operations and Management.

Mipasabot si Tancinco nga usa sa mga paagi sa taga Citom pagsikop sa mga abusadong drayber mao ang pagtago sa kilid sa mga kadalanan unya bantayan ang drayber kon relihiyoso ba kining motuman sa balaod sa trapiko.

Miingon si Tancinco nga gitugotan ra kini sa balaod tungod kay maoy kinaiya sa mga drayber dinhi sa Sugbo nga kon way magbantay sa mga lugar nga dili pahunongan ug pasakyag pasahero, tuyoon gyud ang paglapas ning maong balaod basta way magbantay nga enforcer.

Mao kini gitawag og entrapment aron madakpan sa akto ang mga drayber nga dili kamao motuman og balaod, matud pa ni Tancinco.

Ang maong pamahayag gihimo ni Tancinco agig tubag sa daghan kaayong panaway sa mga drayber kalabot sa enforcer nga dili kaayo magpaapopa sa karsada.

Unya sa panahong naa nay drayber nga mahinayak pagtuyo sa paglapas sa balaod, dihadiha mokalit lag tungha ang mananakop.

Kasagaran sa mga drayber masuko kay nagtuo silang gilingla lang sila sa taga Citom.

Mosamot ang ilang kayugot ilabi na kon sugnoran sa mga pasahero aron mosilaob ang kapungot sa drayber.