Lab-asera patay sa disgrasya

Patay ang usa ka lab-asera human milabang sa tunga sa karsada ug nadasmagan sa naghaguros nga habalhabal pasado alas 4 sa miaging hapon sa National Road Sitio Calye Rizal, Poblacion, Medellin.

Ang namatay giilang si Florefes Sabada, 33, minyo ug nagpuyo sa Mahayahay, Poblacion.

Samtang ang drayber sa habalhabal nga nakadasmag sa biktima mao si Marlon Brusas, 26, minyo ug nagpuyo sa Daanglungsod, Medellin nagmaneho sa Ramstar 100 kolor blue.

Si SPO3 Yolando Jurcales sa Medellin Police mitug-an sa Banat News ang biktima naglukdo pa sa iyang isda nga gisulod og balde samtang nanuroy sa mga kabalayan subay sa daplin sa karsada.

Apan kalit lang milabang sa pikas dalan ang biktima ug wala kini makabantay sa naghaguros nga motor hinungdan nga naigo kini.

Matud ni SPO3 Jurcales nga nangalagpot ang dalang isda sa biktima sa dihang naigo sa motorsiklo ug nalabay paingon sa aspaltong dalan.

Daling gidala ang biktima sa Don Severo Verallo Memorial Hospital sa Bogo apan gideklarar kining patay sa mga doktor nga midangat sa maong tambalanan.

Human sa maong aksidente si Brusas nasikop sa grupo ni SPO1 Jesus San Jorjo ug gi-turn over ngadto sa police station.

Suma pa ni SPO3 Jurcales nga ila nang gipasakaan si Brusas sa kasong reckless imprudence resulting to homicide.