Programa paras' kabataan

Ang Ramon Aboitiz Foundation milusad og programang "Young Minds Academy" nga gipahigayon diha sa Bryant George Hall, Eduardo Aboitiz Development Studies Center, kagahapon sa buntag ning dakbayan sa Sugbo.

Ang programa usa ka scholarship nga abli sa tanang batan-on nga nag-edad og 12 anyos ngadto sa 30 anyos nga interesadong mogahin sa ilang oras nga mohatag og serbisyo sa komunidad.

Tumong niini mao ang paghulma og mga umaabot nga lider sa katilingban ingon man mga responsableng lomulupyo gikan sa pundok sa kabataan karon.

Ang Ramon Abiotiz Foundation Inc. usa ka "social development non-profit organization" nga mihimo na og daghang mga programa.

"Promoting the concept and practice of responsible and accountable citizenship to our young generation," matud pa ni Fatima Soberano ang Program Officer-Training and Consultancy.

Matud pa 30 porsiyento sa populasyon sa atong nasud mga batan-on nga nag-edad ug 21 anyos paubos, ug kini nagrepresentar nga patas lang ang "young citizenry".

Dako ang pagtuo sa grupo nga dunay potensyal ug hayag nga kaugmaon ang kabataan sa nasud maong naghatag kini og ideya nga tagaan sila og higayon sa paglambo.