Pusher gisiluta'g 'priso dose ngadto sa kinse ka tuig

Gihukmang mabilanggo ni Regional Trial Court (RTC) Judge Gabriel Ingles sa branch 58 sulod sa 12 ngadto sa 15 ka tuig ang usa ka 32-anyos nga lalaki tungod sa paghupot niini og shabu.

Gawas sa maong silot, ang akusado pabayaron usab og P300 mil nga multa.

Si Romano Lucernas, taga Barangay Pasil niining dakbayan nasikop niadtong Marso 2005 sa gipahigayong operasyon sa kapolisan sa Cebu City Police Office (CCPO) batok sa ginadiling drugas diha sa Barangay Sawang Calero niining dakbayan.

Base sa pamahayag ni SPO1 Williard Selebio kinsa kuyog sa operasyon, nga nakita nila si Lucernas nga adunay gikumkom ug dihang gibukhad ang kamot niini usa ka paketeng shabu diay ang gihuptan sa akusado.

Apan ang maong mga pasangil gihimakak ni Lucernas kinsa matud niini nga nagtan-aw siya og duwa sa video carrera ug kalit lang siyang gisikop sa mga polis tungod kay gipasanginlan siyang miduwa sa nahisgutang sugal.

Apan si Lucernas napakyas og pamatuod sa iyang paghimakak sa mga pasangil batok kaniya hinungdan nga gisilotan siya sa nahisgutang silot.