Nakaanak atol sa CEBECO1 election

Ang election sa pagka sakop sa board of directors sa CEBECO 1, gihimo didto sa lungsod sa Barili, Cebu, kaniadtong Oktobre 14, nga gitugahan sa usa ka talagsaong hitabo. Ang usa ka botante nga inahan nga mabdos didto gayod ipagawas ang iyang gimabdos nga bata sulod sa presinto.

Kining tagsulat nakasaksi gayod sa maong talagsaong hitabo sulod sa voting center numero 10. Usa ka mabdos samtang nagsulat sa ngalan sa kandidato nga iyang gilabanan kalit lang nagping-it sa kasakit sa iyang tiyan ug umaanak na. Suwerte usab nga niadtong tungora didtoy usa ka registered nurse sa Barili District Hospital nga mobotar usab. Siya mao si Nurse Marilou Alquizola Estimo. Gidali dayon niya pagdala ang nagbati na nga babaye ngadto sa tapad ra usab nga school clinic.

Si Mrs. Alquizola Estimo miasoy sa Banat News nga nahimugso ang usa ka bata nga lalake sa alas 10:30 sa buntag ug mitimbang kini og 2.8 libras. Ang inahan sa bata giila nga si Genara Dejillo, taga barangay Patupat sa maong lungsod. Ang inahan ug ang bata gidala dayon ni Estimo ngadto sa Barili District Hospital.

Nahibaw-an nga ang inahan sa bata usa sa mga lumalaban kang Enrique Paras Abellana. Ug matud pa gibunyagan kini ni Mrs. Estimo og Joel Henry Enrique Dejillo kinsa giila nga mao ang "lucky star" sa kandidatura ni Eking Paras Abellana. Tungod niini si Mrs. Andrea Paras Abellana, ang inahan sa bag-ong napili nga sakop sa board of director sa CEBECO 1, ug ang iyang pamilya mohatag og scholarship sa bata kon edukasyon niini, gikan sa elementarya hangtod pagtapos niini sa kolehiyo, ug ingon man iyang panginahanglanon kay matud ni Mrs. Abellana ang bata mao ang nagdala og dibuynas kang Eking Abellana.