BIN nga nanion taktakon — Tomas

Gimando na ni Mayor Tomas Osmeña nga ipataktak sa serbisyo ang sakop sa Barangay Intelligence Network (BIN) nga nadakpan ug nabalhog sa Mabolo Police Station tungod sa kasong grave threats ug paghubog-hubog.

Giangkon hinuon sa mayor nga na-anugnan siya sa gipakitang maayong serbisyo sa mga sakop sa BIN nga gihatagan lang og tag P3 mil nga honorarium sa siyudad ug gigamit sa daghang mga katuyoan sama sa pag-abag sa kapolisan pagpatunhay sa kahusay ug kalinaw sa dakbayan.

Si Danilo Cabaral gimando nga taktakon sa iyang serbisyo.

Apan bisan pa niini wala gihapon kawad-i og pagsalig si Osmeña ug nagtinguha kini nga kuhaon ang mga sakop sa BIN nga maoy tahasan nga mo-train sa mga K9 dogs nga maoy tahasan pagmonitor sa mga bomba ug uban pang explosibo nga gamiton sa mga teroristang pundok pagmugna og kadaut.

Kini tungod kay dunay kompaniya nga gisabot si Osmeña didto sa kaulohan nga supplier og K9 dogs nga gustong magbutang og opisina dinhi sa Sugbo.

Hatagan sa mayor og libreng opisina ang maong K9 dogs company diha sa South Reclamation Project (SRP) ubos sa kondisyon nga ang mga sakop sa BIN ang kuhaon niini nga maoy magsilbing trainor.

Samtang si Supt. Pablo Labra III sa pakighinabi sa Banat News mibutyag nga si Cabaral gipasakaan kagahapon og kasong grave threats ug drunkeness tungod sa iyang kahubog ug pagpanion ni Aileen Sarda ug sa hinigugma niini nga si Alvin Alicante.

Matud ni Labra nga iya nang gipahimangnoan sa pagseminar ug sa pagdestino niini nga kinahanglan motuman sa proseso ug mosubay sa balaod.

Si Cabaral giimbargohan na sa iyang identification card sa BIN ug uban pang mga kagamitan.