John O wa mokubit sa hagit sa architect

Wala mokubit si kanhi Senador John "Sonny" Osmeña sa hagit ni Architect Manuel Guanzon nga makigpostahanay siyag tag P1.5 milyones batok niadtong dili motuo nga mahuman ang Cebu International Convention Center (CICC) karong Nobiyembre 15.

Matud pa ni Osmeña nga anugonan siya sa kuwarta kay lisod kaayo pangitaon kining maong kantidad lahi kang Guanzon nga sayon ra kaayo alang kaniya ang paghipos ning maong kantidad.

Wala hinuon moingon ang kanhi senador nga magbitik siya sa utot kon mahuman ni Guanzon ang CICC sa tukmang panahon, apan alang kang Osmeña mahimong ang mga haligi, bongbong ug atop sa edipisyo mahuman.

Apan ang mga anaa sa sulod sa maong building sama sa mga pansayan, mga instalasyon sa mga matawag nga "sophisticated" nga mga gadgets alang sa ipahigayong kombensyon sa mga lider sa kanasuran sa Association of Southeast Asian Nations ug uban pa, nagtuo siya nga dili kini mahuman.

Labaw sa tanan alang kang Osmeña, way klaro ang pagapostahan, kay ang pagkatarok sa katibuk-ang edipisyo bisan wa pay pintal ug mga panginahanglang dekorasyon sa sulod ug sa gawas niini, makonsiderar nga kini human na.

Busa klarong mapildi ang makigpustahanay kang Guanzon kon way klarong mga reglamanto ug sumbanan kon unsang aspetoha ang isipon niyang mahuman gyud ang maong edipisyo.