Maritime police giluba sa ex-convict

Naangol ang usa ka polis human mabiktima pagpanunggab sa ex-convict sa sitio Paradise Looc, sa Mandaue alas 7 pasado ang takna sa miaging gabii.

Ang biktima mao si SPO1 Luciano Montero, 53 anyos, minyo nga sakop sa Maritime Police sa 7th Regional Maritime Office sa Cebu International Port ug lumad nga taga Tagbilaran, Bohol.

Ang suspetsado mao si Rafael Alex, 41 anyos, ulitawo nga lumad nga taga Looc, dakbayan sa Mandaue.

Si PO3 Trovero miingon nga ang biktima gikan sa tindahan sa maong dapit kay nagpalit og katol dihang gisugat sa suspetsado ug kalit lamang niining gidunggab.

Ang biktima kinsa nakabaton og samad sa bukton ug uban pang bahin sa lawas dali nga gidala sa Mandaue City Hospital apan gibalhin kini sa Vicente Sotto Memorial Medical Center sa dakbayan sa Sugbo.

Gitanggong karon ang suspetsado sa bilanggoan sa kapolisan ug ang kasong attempted murder giatubang na niini.