Polis suspenso'g 120-adlaw tungod sa tikas

Usa ka polis sa Cebu City Police Office ang gisuspenso sulod sa 120 ka adlaw kun upat ka buwan nga walay sweldo gumikan sa giingong pagpamakak niini sa iyang dokumentos.

Ang silot gipirmahan ni PNP Chief Oscar Calderon niadtong Septiyembre 5 ning tuiga diin sugod niadtong Oktubre 1 hangtud Enero 28, 2007 gisuspenso si SPO3 Filomeno Guinto sakop sa Parian police station.

Si Chief Inspector Anecito Perandos, ang hepe sa operations division sa CCPO, mitug-an sa mga tigbalita nga si Guinto gipasakaan og kasong dishonesty diha sa buhatan sa Regional Internal Affairs Service (RIAS).

Si Perandos , kinsa maoy gitudlong summary hearing officer sa maong kaso miingon nga mi-file kaniadto og promosyon si Guinto sa pagka-Senior Police Officer Four (SPO4) diin gikatahong gamay ra kaayong sayop ang nahimo niini sa mga papeles nga iyang gisumiter.

Matud pang Perandos nga wala motug-an si Guinto nga duna kini pending nga kasong administratiba diha sa People Law Enforcement Board (PLEB) apan nadiskubrehan gihapon kini sa Human Resource Development Division sa Police Regional Office 7.

"Ni-file siya og promotion, duna man siyay mga clearances, affidavit ug ubang mga dokumentos, it turn-out nga duna diay siya'y pending nga kaso sa PLEB," asoy pang Perandos.

Ang gidugayon sa serbisyo, labing unang higayon sa paghimo susamang salaod ug ang "tinarong"(in good-faith) nga pag-aplay og promosyon ni Guinto maoy nagpagaan sa silot imbes nga pagkataktak sa serbisyo.

Matud pang Perandos nga ang dishonesty sulod sa organisasyon masilutan og pagkataktak sa serbisyo.