Tampering sa sedula nabulgar sa City Hall

Nabulgar ang usa ka dakong anomaliya sa Cebu City Hall nga pag-tamper sa mga giisyu nga sedula ngadto sa mga negosyante aron mogamay ang mabayran niini sa gobyerno ug mabulsa ang sobra.

Tulo ka mga cashier sa Tax Division sa City Treasurers Office nasakpang mimao-mao sa mga gipang-isyu nila nga sedula ngadto sa mga aplikanteng negosyante.

Sukad niadtong miaging adlaw gibanabanang miabot na og sobra sa P200 mil ang alkanse sa siyudad sa maong pagmaniobra sa tulo ka mga cashier niini nga gitago lang una ang pangalan sa mabayran sa sedula sa mga negosyante nga mag-transak diha sa City Hall.

Base sa minao-maong mga rekord nadiskubrehan nga ang tag P500 ug P300 nga bayranan sa sedula himoon nila nga P50 ug P30 ang kopya nga mao lay ilang basihan sa pag-remit sa siyudad.

Si City Treasurer Tessie Camarillo nagdumili pagpa-interbiyu sa mga sakop sa media kagahapon may labot ning maong isyu ingon man wala usab diha sa iyang buhatan ang hepe sa Cash Division nga si Esterlita Garrido dihang kuhaan unta og habig sa mga tigbalita.

Si Mayor Tomas Osmeña daling nimando og subsob nga imbestigasyon batok sa mga gitumbok nga utok sa maong anomaliya ug ingon man mimando kini pagtaktak sa maong mga kaswal nga kawani.

Ipaapil sa imbestigasyon sa mayor ang hepe sa Cash Division nga si Garrido gumikan sa kapakyas niini og monitor sa kalihukan sa iyang mga sakop nga cashier.

Hinuon daling nanghunaw sa maong anomaliya ang assistant chief sa Cash Division nga si Joseph delos Reyes dihang nahinabi sa mga tigbalita tungod kay matud niya dunay mga liquidator ang mosusi sa maong mga cashier sa matag request nila og bag-ong stubs sa sedula.