Si Bokal Victor Maambong ang mopasiugda sa public hearing sanglit siya ang nangamahan sa maong ordinansahon.
Ang "The LPG Conversion Ordinance of Cebu" gitumong kini sa pag-regulate sa mga sakyanan nga gamitan na og LPG gikan sa pagpadagan sa gasolina ug krudo.
Gatusan na sa mga sakyanan ilabi na sa mga taxi units sa Sugbo ang gigamitan og LPG sanglit mas makaminus kini sa paggamit sa gasolina.
Apan nitumaw ang kahadlok sa mga sumasakay human nikalas og duha ka kinabuhi ang pagboto sa usa ka laundry shop sa dakbayan sa Mandaue gumikan sa tangke sa LPG.
Kini ang nakapaaghat kang Maambong sa pagduso og usa ka resolusyon nga nag-awhag sa Land Transportation Franchising and Regulatory Board nga ipa-regulate ang mga taxi units nga nigamit og LPG.
Ang resolusyon gisundan dayun ni Maambong sa nahisgutang ordinansahon.
Ang Metro Cebu Taxi Operators Association, Inc. sa sayo pa nipadayag na sa ilang pagsupak sa tinguha ni Maambong.
Gani, nangayo na og rekonsiderasyon ang grupo sa pagpasar sa hunta probinsiyal sa resolusyon ni Maambong.
Hatagan og higayun sa hunta probinsiyal nga madungog ang tanang interesadong grupo labot sa ilang baruganan atol sa public hearing.