Bomb threat sa capitol

Usa ka karton nga gituohang dunay bomba ang napalgan sa parking lot sa Kapitolyo duol sa buhatan sa gobernador pasado alas tres kagahapon sa hapon.

Ang karton napalgan duol sa multicab nga dunay plate number nga SHK 580 nga gimaneho ni Jimmy Oliva, kinsa maoy nakakita sa karton.

Si Oliva ang dali nga nitaho sa mga security guard sa Kapitolyo kinsa mao dayun ang nitawag sa bomb squad sa Speacial Weapons and Tactics sa dakbayan sa Sugbo.

Miresponde usab dayun ang mga sakop sa Special Reaction Unit sa Cebu Police Provincial Office.

Wala makamugna og kaguliyang ang maong alarma sanglit hilum nga gipahimutang sa luwas nga lugar sa Capitol Social Hall sila si Gob. Gwendolyn Garcia ug ang iyang mga bisita lakip na si Capitol consultant, kanhi Gob. Pablo Garcia.

Wala pakaliti sa pagpahibawo ang mga kawani sa Kapitolyo aron dili kini makamugna og kaguliyang ug moresulta usab sa kahadlok sa uban.

Atol sa insidenti, wala pa usab makauli ang mga sakop sa hunta probinsiyal kinsa bag-o lang nihuman sa ilang sesyon.

Daling gidala sa bomb squad sa SWAT ang gikatahapan nga karton aron himoan sa dugang pakisusi.

Apan nasuta nga mga medalya ang sulod sa karton hinungdan nga gihatud kini pagbalik sa taga SWAT sa buhatan sa gobernador.

Hangtud pagsuwat ning balita, wala pa masayri kon kinsa ang tag-iya sa karton nga may mga medalya.