Modernong Waterfront police station human na

Pormal nang itugyan ngadto sa kapolisan sa siyudad sa Sugbo sa katapusan karong bulana ang bag-o ug modernong buhatan sa Waterfront Police Station nga gigastuhan sa Cebu Chamber of Commerce and Industry (CCCI).

Gibutyag ni Konsehal Procopio "Coping" Fernandez, chairman sa committee on police fire and penology dako og matabang ug makapalig-on sa moral sa kapolisan ang bag-o nilang buhatan may labot sa kampanya niini pagmintenar sa kahusay ug kalinaw sa dakbayan.

Kini maoy ikaduha nang police station dinhi sa dakbayan nga nabag-o nga gigastohan sa CCCI ug P2.8 milyones. Ang Mabolo Police Station ug ang fire substation maoy unang gibag-o human gigastuhan gihapon sa mga negosyante sa Sugbo.

Natigayon kini ubos sa programa nga gilusad sa siyudad nga "adopt-a-police station" diin nakigsabot ang mga opisyal sa siyudad pinangulohan ni Bise Mayor Michael Rama, chairman sa PCAC ngadto sa mga magpapatigayon aron motabang og gasto sa pagpa-ayo sa mga gubaong police station tungod kay walay pundo ang PNP.

Matud sa konsehal, ang Tabo-an Police Station maoy sunod gastuhan og ayuhon nga ibalhin na unya kilid sa fish market sa Taboan.