Duha ka Koreyano nagsumbagay dakpan

Duha ka mga Koreyano ang gidakop sa kapolisan human parehong nagsinukliay og kumo diha sulod sa usa ka restobar sa dalan Salinas Drive, sa Lahug ning dakbayan kagahapon sa kaadlawon.

Ang duha giilang sila si Ruen Yun Seok Hyo,26, nagtuon sa usa ka language school diha sa dalan Manalili diin mao usab iyang gipuy-an ug ang iyang gikaaway mao si Jove Park Jeon Weou,23, stay-in usab sa laing tunghaan diha sa barangay Banilad ning dakbayan.

Sumala pang PO1 Fatima Gomez sa Mabolo police station mitug-an sa Banat News nga ang duha parehong nag-inom diha sa maong dapit ug mitumaw ang ilang panag-initay hangtud nga misangpot sa sinukliay og kumo.

Matud pa sa mga report sa mga lokal nga sibyaanan nagkatibulaag ang mga kustomer atol sa insidente hinungdan nga nanawag og polis ang tag-iya.

Ang mga langyaw gidakop sa grupo s Mobile Patrol Group ug gidala sa Mabolo police station aron imbestigahon, apan dangtan og pila ka gutlo ang duha nag-uliay sa ilang buot ug gibuhian ra dayon.