Ang namatay giilang si Joel Beldad,45, residente sa sitio Manga sa nahisgutang barangay kinsa gikunis-kunis sa bala dihang gipusil sa suspek nga si Danilo Tabada Jr. nga residente usab sa maong dapit.
Matud pa sa imbestigasyon ni SPO1 Desiderio Mendaros sa Homicide Section ang biktima sa sayo pa mibuhi og mga pasiaw samtang nag-inom uban sa mga higala sa suspek.
Giingong wala makauyon ang suspek sa pasiaw sa biktima hinungdan sa pagtumaw sa ilang panaglalis, ug ang biktima nakadesider nga mamahaw diha sa balay ni Bernarda Matig-a.
Apan sa kalit lang, misunod kaniya ang suspek ug walay daghang pangutana mibunot og armas nga kalibre 9 mm ug gipusil makadaghang higayon si Beldad.
Si Beldad nakaangkon og samad pinusilan duha sa wala ug tuong dughan, likod ug duha ka samad diha sa walang bukton, patay na kining miabot sa Cebu City Medical Center.
Samtang ang suspek daling miikyas human sa pagpamusil. Duha ka basiyo sa maong kalibre sa armas ang nakaplagan diha sa crime scene.