NBI-7 mosusi NA's vigilante

Ang National Bureau of Investigation (NBI-7) mosugod og susi sa nahitabong pagpamatay sa Sugbo mugna sa mga vigilantes, human ang direktor niini mipasalig nga andam modawat sa mga ebidensiya nga isumiter sa Integrated Bar of the Philippines -Cebu City Chapter.

Si Atty. Medardo de Lemos miingon nga wala pa sila makadawat sa mga dokumento gikan sa IBP Cebu City Chapter, apan ila kining gipaabot aron masusi ang sunodsunod nga pagpatay nga may kalambigitan ang giingong mga vigilantes.

Sumala pa ni de Lemos nga kun moabot kini sa ilang buhatan ila gihapon kining tagdon sama sa mga kaso nga giimbestigar sa iyang mga sakop nga mga agents.

Giangkon ni de Lemos nga ang kabanay sa mga biktima sa vigilantes midangop usab sa ilang buhatan ug nagpakitabang nga mahatagan og hustisya ang mga mahal nila sa kinabuhi nga gipamatay.

Si de Lemos miingon nga ang mga ebidensiya ug dokumento nga gikan sa IBP iduso ngadto kang Atty. Hermie Monsanto kinsa maoy naggunit sa mga kaso sa summary execution sa dakbayan sa Sugbo.

Kahinumduman, si IBP Cebu City Chapter President Atty. Alex Tolentino mipadayag sa iyang tinguha pagduso ngadto sa NBI-7 sa tanang mga dokumento ug ebidensiya batok sa ilang mga nahuptang mga ngalan sa miyembro sa vigilantes nga naglihok sa dakbayan sa Sugbo.

Bugtong tinguha ni Tolentino nga ma-imbestigar ug mapasakaan og kaso ang mga tawong nagpaluyo niining extrajudicial killing dinhi sa Sugbo ug sa ingon kahatagan og hustisya ang mga pamilya sa mga gipamatay.

Ang mga opisyal sa dakbayan mihangop usab sa saad sa IBP nga mohatag og mga ebidensiya aron mailhan ang mga vigilantes.

Si Mayor Tomas Osmeña ug Konsehal Procopio Fernandez, chairman sa committee on police nagkanayon nga gipaabot nila ang pagbutyag ni Tolentino sa mga ngalan sa giingong mga vigilantes nga naglihok dinhi sa Sugbo.