Pres. Arroyo PGMA mosuporta sa mga kapitan

Gipangayo sa kahugpungan sa mga barangay kapitan lukop nasud ngadto kang Presidente Gloria Arroyo nga hatagan sila og higayon nga direktang makapatuman sa mga programa sa presidente diha sa ilang tagsa tagsa ka lugar.

Usa kini sa mga butang nga gipaabot ni Liga ng mga Barangay National President James Marty Lim ngadto kang Presidente Arroyo nga maoy pinasidunggang dinapit sa 8th National Convention of the Liga ng mga Barangay nga gipahigayon sa Waterfront Hotel kagahapon.

Ang maong convention gitambungan sa mga opisyal sa 42 mil ka mga barangay lukop nasud ni-presentar sab ngadto kang Presidente Arroyo sa ilang 10 point agenda sa barangay nga gitumong pagpalig-on sa panerbisyo sa ilang mga konstituwenti.

Sentro sa agenda sa mga kapitan mao ang kahimsog sa panglawas, pagkaon, paghatag og edukasyon sa mga kabataan, pagpatuman og mga livelihood program ug ingon man ang pagpatunhay sa kahusay ug kalinaw.

Labaw sa tanan gipasalig sa Liga ngadto kang Presidente Arroyo nga kanunay nilang suportahan ang mga programang ipatuman sa kasamtangang administrasyon.

Partikular na niini ang kampanya sa Presidente batok sa mga teroristang pundok nga nagplanong magmugna og kagubot dinhi sa nasud ilabina sa nagsingabot nga Asean Summit karong bulan sa Disyembre ug ang planong computerization sa umaabot nga pinili-ay.

Gipasalig sab ni Arroyo nga suportahan ug paluyohan ang mga proyekto sa Liga ng mga Barangay ug gani gitubag dayon sa Presidente ang hangyo ni Lim nga mao ang pagbutang sa gobyerno og tagsa ka mga scholar sa matag barangay dinhi sa nasud ug ingon man ang pagpalapad sa micro financing sa barangay aron makatabang kini sa panginahanglan sa mga opisyal.

Si Presidente Arroyo sab ang nangunay pagtugyan sa napulo ka mga barangay kapitan nga nakadawat og certificates of scholarship sa Ladderized Education Program ug ang paglagdaay sa Memorandom of Agreement (MOA) tali sa Honda Philippines, Tesda ug Liga ng mga Barangay alang sa programa nga Mekaniko sa Bawat Barangay.