Allowance sa 4 ka polis gitangtang, drug test undangon

Si Supt. Romeo Perigo, hepe sa kapolisan sa Talisay mipatangtang sa mga allowance sa upat ka polis kinsa wala magpa-drug test.

Ang nahisgutang mga polis mao sila si SPO1 Leo Amores, SPO1 Rodulfo Estrada, PO2 Amelito Hornales ug PO1 Alan Villazurda.

Kahinumduman nga niadtong kataposang semana sa Septiyembre ang kagamhanan sa dakbayan mipahigayon og surpresang drug test sa mga polis sa siyudad aron pagpiho sa mga taho nga ilang nadawat nga adunay mga polis sa dakbayan nga naggamitan og ginadiling drugas.

Apan tanang mga polis nga nakuhaan og drug test pulos negatibo ang resulta niini.

Kahinumduman usab nga si Bise Mayor Aberdovey Belleza, tsirman sa komitiba sa kahapsay ug kalinaw mibahad nga palagputon gikan sa siyudad ang nahisgutang upat ka polis kun wala kini balidong mga rason.

Niadtong Septiyembre 26 si Belleza mipadangat og memorandum ni Perigo aron pangayoan og balidong rason ang upat ka polis ug pahamtangan kini og disciplinary action.

Kagahagapon si Perigo mibutyag sa Banat News nga mipadala na siya og rekomendasyon ni Mayor Socrates Fernandez nga patangtangan sa ilang mga madawat nga allowance ang maong mga polis.

Si Villazurda mipa-drug test na kini diha sa Crime Laboratory ug gipakuyogan kini ni Perigo ug laing polis. Ang kagamhanan sa Talisay naghatag og P1,000 nga incentive matag buwan kada polis.