2 ka tulisan nasikop

Nasikop sa kapolisan sa Talisay niadtong Martes sa gabii ang duha ka suspetsadong tulisan kinsa nanion og drayber sa multicab diha dapit sa taytayan sa Mananga, Tabunok, Talisay.

Ang mga suspetsado giila sa mga polis nga si Woodly Esguerra, 25, taga Sityo Sambagan, Tabunok ug Warlito Aga Gallenero, 32, residente sa dalan Tres Borces, Mabolo niining dakbayan.

Nasakmit sa grupo sa alert team sa kapolisan sa siyudad pinangulohan ni SPO2 Raul Bacayo gikan nila ni Gallenero ug Esguerra ang duha ka .38 kalibreng armas diin matag usa niini adunay tulo ka buhing bala.

Ang kapolisan sa dakbayan nakadawat og tawag gikan sa usa ka pasahero kinsa wala magpaila sa nahisgutang multicab nga paingon sa Naga.

Base sa imbestigasyon sa kapolisan nga gitionan ni Gallenero ug Esguerra ang drayber sa multicab sa gidala niining mga armas apan ang drayber daling nakapadagan sa iyang sakyanan pahilayo sa lugar.

Ang grupo ni Bacayo daling miresponde sa maong alarma ug natagboan nila ang mga suspetsado nga kalma kaayong naglakaw diha sa karsada.

Nabantayan sa maong mga polis nga miresponde nga dunay nagbagal sa mga hawak nila ni Esguerra ug Gallenero hinungdan nga ila kining gisita ug napiho nga ang nahisgutang mga armas ang giluklok sa kilid sa duha ka suspetsado.

Si Gallenero ug Esguerra nagtingkagol karon sa Talisay detention cell ug nag-atubang sa kasong illegal possession of firearms nga gipasaka sa kapolisan batok kanila kagahapon sa buntag diha sa Talisay City Prosecutors Office.