Polis suspek pagpatay sa lender dunay hulga

Ang polis nga maoy suspek sa pagtulis ug pagpusil patay sa money lender ug ang secretary niini misumbong sa iyang hepe nga nakadawat siya og daghang pagpanghulga sa kinabuhi lakip na sa iyang pamilya.

Kini human si SPO1 Mateo Yanson mipatim-aw sa iyang bag-ong gidestinohan sa miaging adlaw sa Security Service Group (SSG) human siya girelibohan gikan sa Fuente Police Station.

Ang hepe sa SSG nga si Supt. Mariano Natuel sa pakighinabi sa mga sakop sa media kagahapon nagkanayon nga gikuyogan si Yanson sa usa ka abogado nga si Atty. Danilo Yap.

Matud sa hepe nga igo lang mikuyog si Yap agig suporta ngadto ni Yanson.

Si Yanson nangatarongan ngadto ni Natuel nga wala siya maka-duty sa nangaging pipila ka adlaw kay iyang giasikaso iyang kaso ug ingon man ang pag-undang sa pagtungha sa iyang usa ka anak sa sekundarya.

Nakasabot si Natuel ni Yanson sa kahimtang niini ug matud niya kapoy kaayo ang lawas niini.

Sa pagkakaron si Yanson kasamtangan gibutang sa headquarters ug posibling ibalhin og i-detail isip guard sa Cebu City Police Office.

Iyang gimanduan nga kinahanglan mo-report kada- adlaw ang maong polis.

Misaad hinuon si Yanson nga dili siya mo-eskapo ug iyang atubangon ang kaso nga gipasangil batok kaniya ug andam siyang magpapriso.

"Gikondisyon na daan niya iyang mind nga atubangon gyud niya ang kaso, dili man siya molayas," asoy ni Natuel

Matud pang Natuel si Yanson misulti kaniya nga dunay mga tawo nga nagpaniid sa ilang panimalay pila na kagabii nga magsakay ug motorsiklo.

Gawas sa nagmotor nga mga tawo duna pay nagsunodsunod og tawag sa telepono nga naghulga kaniya ug sa iyang pamilya.

Gitambagan ni Natuel si Yanson nga magbantay gyud kanunay sa iyang kaugalingon.