Pamilya sa nursing naghikog mireklamo sa mga estorya

Pamilya sa usa ka tinun-an sa nursing nga naghikog sa milabay'ng semana mihimakak sa pasangil nga adunay duha ka babaye ang mianha sa buhatan sa clinical instructor sa tunghaan diin ang biktima nagtungha ug ang usa sa maong babaye mihulga sa maong magtutudlo tungod kay siya maoy gitumbok nga hinungdan nga naghikog ang nahisgutang tinun-an.

Kahinumduman nga ang biktima nga si Christie Bernardo, 19, 3rd year college sa nahisgutang kurso taga Pooc, Talisay.

Base sa talaan sa Cebu City Police Office (CPPO) Homicide Section usa ka Alex Magalona ang nagpa-blotter diha sa ilang buhatan.

Si Magalona mipasangil nga gihulga siya sa usa ka wala mailhing babaye diha sa ilang faculty room.

Matud ni Magalona nga aduna siyay gimaymayan nga usa ka tinun-an tungod kay dili kumpleto ang uniporme niini apan wala gitataw ni Magalona kung si Christie ba ang iyang gimaymayan.

Si Magalona mipasangil nga ang maong babaye adunay dalang armas hinungdan nga misumbong siya sa mga polis tungod sa iyang kahadlok.

Kagahapon sa hapon mibisita sa buhatan sa Banat News si Esther Escañan, 60, iyaan ni Christie ug Esteven Sasam, 28, usa ka magtutudlo sa University of San Jose Recoletos (USJR) kinsa ig-agaw sa biktima.

Gibutyag ni Escañan nga si Bernardo nagpuyo sa iyang igsoon nga si Marina Galamiton kinsa walay anak ug iyaan sa biktima.

Si Galamiton uban sa iyang bana nga si Boy nga mianha sa buhatan ni Magalona apan dili tinuod nga nagdala ang magtiayon og armas.

Ang tumong sa magtiayon sa pag-anha nila sa buhatan ni Magalona mao nga matubag ang ilang mga pangutana kun unsay nahitabo sa wala pa maghikog si Christie.

Ang pamilya ni Christie mipasangil nga si Magalona maoy naka-trigger nga naghikog ang biktima.

Si Escañan midungag nga kun aduna pay dalang armas ang iyang igsuon posible nga dili kini pasudlon sa guwardiya tungod kay ang unibersidad nga gialagaran ni Magalona adunay mga gwardiya.

Si Escañan mibahad nga mopasaka og kaso batok ni Magalona kun mapahimutang na nila ang patay'ng lawas ni Christie sa kataposan niining pahulayan.

Si Sasam nagkanayon nga ang mga magtutudlo unta dili angayang i-pressure niini ang mga estudyante ug dili usab nila abusohan ang mga tinun-an pinaagi sa "verbal" nga paagi ug angayan unta nga mangita sila og paagi nga ang ilang mga estudyante maningkamot sa pagtuon ug ila kining giyahan kung unsay angayang buhaton.

Ang pamilya ni Christie migama na og usa ka suwat para ipadangat sa medical director sa tunghaan nga gitunghaan sa biktima aron makahibawo kini sa nahisgutang insidente.