CICC bintaha sa mga silingan

Dako kaayo'g ikatampo alang sa gitinguhang kalambuan sa lalawigan sa Sugbo ug silingan niining lalawigan nga sama sa Bohol, Negros ug Siquijor pa ang kaugmaran sa Cebu International Convention Center (CICC) sa dakbayan sa Mandaue.

Si Mayor Thadeo Ouano maoy mipadayag niini sa pagpakighinabi sa Banat News niadtong miaging adlaw nunot sa naghingusog karon nilang pagpangandam sa 12th Association of Southeast Asian Nation (Asean) Summit karong Disyembre 2006.

Giangkon hinuon niya nga ang dakong bintaha sa dakbayan sa Mandaue ang kaugmaran sa maong edipisyo sanglit ang matag dagkong kalihukan nga kalibutanon anha na ipahigayon.

Gipasabot ni Ouano nga duol sa port area sa dakbayan sa Sugbo ug Mactan Cebu International Airport sa dakbayan sa Lapulapu nga maoy hinungdan nga ang sagad sa kapitalista mangita gyod og luna sa dakbayan nga kabutangan sa ilang negosyo.

Naglakip niini ang pagbansay sa mga lumolupyo niini sa mga trabaho nga sagad unya maoy gikinahanglan sa tukoron pagatukorong bag-ong pabrika o patigayon.