Gidunggab patay tapos sa disko sa Carreta

Patay ang usa ka 45 anyos nga mekaniko human kini dunggaba sa usa ka gikatahong ex-convict nga iyang gikabangga samtang nanayaw diha sa usa ka disko atol sa pista sa sitio Laray, Carreta kagahapon sa buntag.

Ang biktima giilang si Rodencio delos Santos, residente sa maong dapit ug gitumbok nga ang midunggab kaniya giilang si Eddie Lagaras alyas Patok, kinsa giingong ex-convict gikan sa Muntinlupa.

Matud pa sa kapuyo sa biktima nga si Berlinda Rico, naabot sa ilang balay nga nagkadugo ang bana kagahapon sa buntag ug misugilon kaniya nga si Lagaras maoy midunggab kaniya.

Sumala pang Rico nga nianang pagkagabii nagkasaghiray ang biktima ug ang suspek atol sa disko apan wala niya damha nga dunggabon sa suspek ang biktima nianang pagkabuntag samtang nagpadulong nang mouli si delos Santos.

Gikatahong kauban pa sa suspek ang iyang uyoang giilang Johny kinsa gitumbok nga maoy mipatid sa biktima.

Ang biktima daling gidala sa Vicente Sotto Memorial Medical Center apan dangtan og pila ka gutlo nakabsan kini sa kinabuhi.