Ilegal koleksyon panid-an

Si Konsehal Richel Bacaltos, tsirman sa edukasyon sa siyudad sa Talisay mipasar og resolusyon nga nag-awhag sa city school division chief nga mag-monitor sa kalihokan sa mga tunghaan sa siyudad ilabi na kung naglambigit kini sa pundo ug sa Parents Teachers Community Association (PTCA).

Bag-o lang si Bacaltos nakadawat og reklamo gikan sa mga ginikanan sa mga tinun-an sa Talisay Central School diha sa Barangay Poblacion kabahin sa pagpangolekta og sobra sa P200 nga bayranan sa matag tinun-an sa opisyal sa tunghaan.

Ang maong tunghaan adunay sobra sa 2,000 ka tinun-an nga nagtungha.

Si Bacaltos nagkanayon nga kinahanglan adunay resolusyon gikan sa PTCA kung mangolekta og bisan unsa sa bayad gikan sa mga estudyante sa pampubliko nga tunghaan para masiguro nga tanang transaksiyon legal ilabi na kung naglambigit kini sa salapi.

Ang nahisgutang resolusyon giaprobahan sa konseho sa siyudad sa milabay'ng adlaw.

Gibutyag sa Konsehal nga adunay mga pampublikong tunghaan sa siyudad ang nahimong kontrobersiyal human ang ginikanan sa mga tinun-an nangreklamo tungod sa sobrang mga balayranan.

Si Bacaltos miawhag sa mga tinun-an ug mga ginikanan sa mga tunghaan sa siyudad nga motaho gyud dayon diha sa iyang buhatan kung ang mga opisyal sa tunghaan mangolekta og bayad nga walay pagtugot sa PTCA para mahatagan dayon kini og aksiyon.