Nasuta ni Bokal Victor Maambong nga adunay mga senior citizen ang gusto kaayong makatapos sa ilang pagtuon hinungdan nga migama siya og resolusyon nga nag-awhag sa Department of Education (DepEd) nga suportahan ang mga senior citizen.
Si Maambong mitumbok sa Akta Republika 9257 kon "Expanded senior citizens Act of 2003" nga nagkanayon nga ang mga qualified Senior Citizen adunay katungod nga hatagan og ayuda nga pang-edukasyon pinaagi sa paghatag kanila og scholarship.
Lakip nga ihatag nga ayuda sa pagpadayon sa pagtuon sa mga senior citizen mao nga hatagan usab sila og incentives, suportahan sa mga libro nga ilang mga gikinahanglan, learning materials ug allowance sa uniporme.
Matud ni Maabong nga ang DepEd angayang mogtukod og mga programa nga makapadasig sa mga senior citizen para matuman niini ang ilang mga plano.
Si Bokal Agnes Magpale usa usab sa nagpaluyo sa nahisgutang resolusyon nga ipasar karong adlawa sa konseho sa probinsiya.