Ang maong mga tulisan nga nagsakay og motorsiklo miigo sa A1 Micro Finance Incorporated diha sa dalan Jones Avenue ug Asialink Finance Corporation diha sa dalan Mango Avenue diin nasakiyo ang dul-an P200 mil ug mga gamit sa mga empleyado ug mga kliyente.
Matud pang Ibones sa mga tigbalita kagahapon, walay lokal nga mga tulisan nga makahimo niini susama ka "daring" ug dako ang iyang pagtuo nga dili taga dinhi sa Sugbo ang mga suspek.
Niadtong Miyerkules gipahibalo ni Cebu City Director Melvin Gayotin nga nakadawat sila og impormasyon kabahin sa grupo sa mga tulisan gikan sa Mindanao nga nangabot aron molusad og mga pagpanulis sa mga estabilisamento lakip na ang mga bangko dinhi.
Dugang pa ni Ibones nga ila pang gisubay karon pinaagi sa mga litrato kung mao na ba kining grupoha ang gipasabot sa impormasyong ilang nadawat.
Sa pagkakaron ang mga testigos wala pa makatumbok sa mga litratong gipakita kanila tungod kay posibleng nahadlok pa sila tungod sa hitabo.
Giawhag karon ni Ibones ang mga negosyante sa pagkuha og mga gwardiya, pagbutang og security cameras sa ilang dapit. Ang duha nga gitulis niadtong Huwebes pulos wala niini.
Gitinguha karon sa kapolisan ang paglusad og "clustering" sa mga estabilisamento diin ang ilang mga emergency devices konektado sa mga sikbit nga tindahan aron makamatikod tanan nga dunay nahitabong tulis diha sa ilang kasikbit ug makatawag og polis.
Apan sumala pa sa mga polis duna nay mga pagpadayag gikan sa sektor sa mga negosyante nga nabalaka silang basin tungod niini ma-hostage ang ilang mga kawani.