Mga vans nga peligroso gimando nga ipakuha

Gimanduan sa konseho sa siyudad sa Sugbo ang Cebu Port Authority (CPA) ingon man ang mga shipping company sa pagkuha sa mga nagpatongpatong nga container vans sa North Reclamation Area ug Pier Area nga nakahatag og peligro sa mga tawong moagi sa maong lugar.

Mao kini tumong sa gipanday nga resolusyon ni Konsehal Procopio Fernandez nga iyang ipasar sa sesyon sa konseho sunod semana.

Nakadawat og daghang reklamo ang konsehal kabahin sa mga gipatongpatong nga mga container vans diha sa North Reclamation Area nga peligro sa disgrasya ilabi na kun dunay motumaw nga kusog nga hangin.

Kagahapong adlawa personal nga gitawagan sa konsehal ang Regional Director sa Regional Disaster Coordinating Council (RDCC) Angel Gaviola aron mohimo og lakang batok sa maong mga gipasagdan nga mga container vans.

Giangkon hinuon ni Gaviola dihang nahinabi sa Banat News nga sayo pa ning tuiga iya nang gipahibalo ang CPA ug ang mga shipping companies ning maong problema apan hangtod karon wala gyud kini aksiyon nga gihimo.