Kapitolyo motukod og water authority para mga lungsod

Si Gobernador Gwendolyn Garcia mibutyag nga ang kagamhanan sa lalawigan nagtukod og Provincial Water Authority (PWA) nga mag-encourage sa mga bulk water supplier aron mo set-up og bulk water supply.

Ang tuyo sa probinsiya sa pagtukod sa PWA aron ang dagkong supplier og tubig makig-deal sa probinsiya sa ilang pag-invest sa bulk water supply.

Gikan sa probinsiya, ang mga distributors maoy mosuplay sa tubig nga gikinahanglan sa mga lumolupyo sa mga lugar sa probinsiya.

Gitataw usab sa gobernador nga ang mga mahimong distributor sa tubig mao ang mga kooperaba, asosasyon, distrito ug lokal nga kagamhanan.

Kahinumduman nga sa milabay'ng adlaw, ang konseho sa siyudad sa Sugbo mipatawag og public hearing kabahin sa gisugyot nga Carmen Bulk Water Project.

Ang mga opisyal sa Metropolitan Cebu Water District (MCWD), Ayala-Stateland Consortium ug ang International Finance Corporation sa World Bank miatubang sa mga isyu kalabot sa maong proyekto.

Si Mayor Tomas Osmeña padayon nagsupak sa mga provision sa kontrata nga gisugyot sa Ayala.

Si Garcia mitakda nga makigtigum sa mga opisyal sa Carmen aron tukion ang nahisgutang proyekto sa tubig.

Sa laing bahin, si Capitol Consultant Pablo John Garcia mikwestiyon ngano ang Ayala buot mopa-reimburse sa mga galastuhan ug mibuhat kini og mga proposal nga walay nagsugo kanila.

Sa solicited proposal dili makadaog nga bidders wala mangayo og re-imbursement sa ilang nagasto.

Gipasabot ni Pablo John nga ubos sa balaod aduna nay advantage ang paggama og una og proposal sa proyekto.

Matud ni Pablo John nga ang paghatag og re-imbursement usa kini ka matang sa korupsiyon nga mahimong masilotan sa balaod.