SK chairman ipa-drugtest

Mahitabo nga dunay drug test kun andam ug interesado ang SK Chairman nga si Carlo Magno Tude nga kasamtangan karon gitanggong sa detention cell sa Cebu City Police Office human masikop sa buy bust niadtong Domingo sa gabii, apil ang katabang sa panimalay nga minor de edad sa Criminal Investigation and Intelligence Branch

Kini agi'g tubag sa hepe sa kapolisan dinhi sa Sugbo Supt. Melvin Gayotin sa pamahayag ni Ermita barangay captain Felicisimo Rupinta.

Sa sayo pa si Rupinta miingon nga andam siyang mo-resign pagka kapitan sa Ermita kun mapamatud-an sa drug test nga positibo sa paggamit og ginadiling drugas si Tude.

Si Gayotin miingon nga wala mosulti ang kapolisan nga usa ka adik si Tude apan ang uban hinuon dunay mga drug pusher nga dili mogamit og shabu apan mamaligya ra.

"Tude allow himself voluntarily to undergo drug test mas maayo seguro, the mean issue is he received the money from the operatives," dugang pa niya.

Si Tude atol sa pakighinabi sa mga sakop sa media kagahapon sa udto nagkanayon nga andam siyang magpa drug test bisan asa nga lugar ug kun kanus-a siya ipaubos sa drug test.

Gipanghambog ni Tude nga nakaseguro siya nga negatibo ang resulta kon mapahigayon kay matud niya dili siya tiggamitan og ginadiling drugas.

Apan giangkon ni Gayotin nga mi-us-os na gyud ang problema sa drugas nunot sa subsob nga pagpanakop sa kapolisan

Matud ni Gayotin mas lig-on ang operasyon sa kapolisan kun moabag pa unta ang mga opisyal sa barangay sa pagsumpo sa ginadiling drugas aron malimpiyohan ang ilang tagsa ka barangay.

"Importante nga dili lang pasanginlan ang mga polis kay base rana sa mga ebidensiya nga atong nakuha gikan nila" dugang asoy ni Gayotin.