15-anyos namaregla mao hinuoy napatay

Usa ka kinse anyos nga batan-on napusilan patay sa giingong lalaking ila untang pareglahan apan mibawos hinuon og pusil kanila diha sa atubangang bahin sa Foodstreet sa barangay Capitol Site ning dakbayan kagahapon sa kaadlawon.

Ang biktima giilang si Ritchman Villamor,15, taga Sampaguita, sa samang barangay, samtang wala pa mailhi ang lalaking mipusil kaniya.

Sa imbestigasyon ni SPO2 Rey Cuyos sa Homicide Section, natino nga naglakaw ang suspek diha sa maong dapit ug gikasugat sa biktima uban sa duha pa ka mga lalaking kauban.

Ang kauban sa biktima nga naila lang sa ngalan nga "Charlie" maoy nagdala og usa ka fluorescent bulb ug dihang naduol na kalit nga gihapsan ni "Charlie" ang suspek.

Apan ang suspek mibawos ug mibunot og wala matinong kalibre sa armas ug mipusil sa biktima makausa ka higayon diin naigo ang iyang likod nga nakaingon sa hinanali niining kamatayon.

Gisubay pa karon sa kapolisan kung miyembro ba sa usa ka gang ang biktima. Ang maong dapit istambayanan na sa mga gang matag gabii diin pipila sa mga miyembro niini mga mamaligyaay og lagutmon diha sa maong dapit.