Segun sa report, ang kapolisan nakadawat og pahibalo gikan sa usa ka concerned citizen pinaagi sa text messages sa text hot line nga samtang ang upat nanglakaw daplin sa dalan nagpakita kini sa armas.
Ang kapolisan daling nakaresponde didto sa maong dapit nga gipangulohan sa hepe nga si Insp. Alexander Ancao, uban nila ni SPO2 Gualberto Arnado, PO2 Rolando Soson ug PO1 Julius Vanguardia.
Ang nadakpan mao sila si Juanito Laag Montealto, 25, Roy Malipang Planquero, 18, Juan Zombrado Biais, 24 ug Josephrel (apelyido gipugngan) 17, pulos mga ulitawo ug parehong lomulopyo sa Poblacion, Liloan.
Sila si Montealto ug Planquero nakuhaan sa ilang posesyon og .38 paltik rebolver dunay tag lima ka buhing bala.
Ang duha wala makapakita og mga papeles sa armas hinungdan nga sila gidakop ug gibalhog sa prisohan.
Ang duha ka kauban niini nga sila si Biais ug Batiquin gi-release sa kapolisan human namatud-an sa kapolisan nga walay mga rekord didto sa Liloan.
Si Insp. Ancao nga nahinabi sa Banat News miingon nga ilang gidisarmahan ang upat sa dihang ila kining gidakop kay nagtuo sila nga pulos armado ang upat apan nasuta nga duha lang ang nagdala og armas.
Matud ni Insp. Ancao nga sila si Montealto ug Planquero igo lang maghatod sa ilang kauban didto sa Bogo aron ilang pasakyon sa pantalan paingon sa Masbate.
"Kining upat niingon ni sila nako nga mi lie low kuno sila sa Liloan kay gi hunting sila sa ilang kontra (Tau Gamma) miangkon man gyud sila nga Akrho member sila," dugang asoy niya.
Dugang pa niya nga ang upat kasamtangan nag-istar sa uyoan ni Montealto didto sa Laaw nga si Antonio Montealto.