Ex-convict gipatay

Kinse minutos human makagawas sa karsel sa Pardo Police Station ang usa ka ex-convict wala na kini makaabot nga buhi sa ilang balay human kini atangi ug gipusil-patay sa upat ka gidudahang mga vigilante gibana-banang 200 ka metros gikan sa police station niadtong milabayng gabii.

Ang biktima nga nabulit og samad pinusilan sa iyang ulo ug kalawasan giilang si Epitacio Ocariza Jr., 22, residente sa Royal, Cogon-Pardo ning dakbayan.

Upat ka lalaking luwan sa duha ka motorsiklo ang gitumbok nga miatang sa biktima diha sa dalan J.Tabura duol sa eskina sa dalan Dacalos sa Poblacion-Pardo ning dakbayan.

Matud pa sa imbestigasyon ni SPO2 Rey Cuyos sa Homicide Section kasamtangang nag-atang sa sakyanan diha sa maong dapit ang biktima dihang kalit nga giduol sa usa ka suspek ug gipusil.

Ang biktima bisan samaran daling midagan palayo apan gigukod kini sa suspek kinsa gikuyugan na sa laing usa pa ka armado hangtud nga naapsan kini sa dalan Dacalos ug diha gikaliguan og bala hinungdan sa kamatayon niini.

Ang Scene of the Crime Operation pinanguluhan ni Supt. Nestor Satur nakakuha og napulo ka basiyo sa .45 kalibre nga bala, usa ka slug ug usa ka metallic fragment diha sa crime scene.

Ang mga suspek daling miikyas padulong sa Inayawan diin gimando ni Relado ang dinaliang pagbutang og roadblock apan nakaipsot gyud ang mga suspek.

Ang biktima nagkumkom pa sa P18.00 nga gikatahong hinatag pa ni Sr.Inspector Alexis Relado dihang mipadayag kini nga wala siya'y pamelete human siya buhii.

Matud pang Relado nga niadtong Septiyembre 30, 2006 nadakpan si Ocariza diha sa atubangang bahin sa Cogon-Pardo barangay hall human kini mikawat sa P1,500 nga kwarta ni Dr. Mitchelle Lopez dihang ang biktima luwan sa usa ka traysikad.

Gikatahong gipaabot nila ni Relado ang complainant nga mopasaka og kaso sukad niadtong Biyernes hangtud tibuok adlaw sa Lunes apan nianang pagkagabii gikatahong mitawag si Lopez nga dili siya interesadong pasakaan og kaso si Ocariza.

Si Ocariza gibuhian alas 8:50 sa gabii, napusilan siya gibana-banang pagka-alas 9:10 nianang gabhiona.

Gipanghimakak ni Relado atol sa pakighinabi sa mga tigbalita nga wala sila makaresponde sa pagpamusil bisan duol ra kaayo ang gikahagbaan sa biktima diha sa ilang police station.

Matud pang Relado nga gikasagmuyo niya ang wala pagkooperar sa mga tawo diha sa palibot dihang nagpangutana sila kung nakakita ba sila sa mga suspek.

"Ang ayaw ko lang duon eh, yung very uncooperative ang mga tao, andaming taong umiinom duon pero ng tanungin namin wala silang nakita buto lang daw ang narinig nila," asoy pang Relado.

Si Ocariza gikatahong nasulod sa Bagong Buhay Rehabilitation Center niadtong Nobiyembre 19, 2005 sa kasong robbery ug nakagawas niadtong Hunyo 14 ning tuiga sumala pa ni SJO1 Lovely Lim sa maong bilanggoan, sumala pa sa Pardo police si Ocariza usa sa mga grupo sa mga manulis diha sa Highway Tagunol sa Cogon-Pardo.