CH wa mahibulong pagkasikop sa SK

Wala masurpresa ang mga opisyal sa siyudad sa Sugbo sa pagkasikop sa SK-chairman sa barangay Ermita nga si Carlo Magno Tude nga nadakpan sa buy-bust operation sa kapolisan tungod sa pagpamaligya og shabu niadtong miaging gabii.

Hinuon nagplano si Konsehal Jocelyn Pesquera, tsirman sa Cebu City Youth Development Council (CCYDC), nga mohimo og lakang aron masusi ang kahimtang sa tanang mga SK chairman dinhi sa dakbayan kun mayoriya ba niini ang nagpakabuang sa gidiling drugas.

Dako ang pagtuo sa konsehal nga isolated case lang ang kaso ni Tude gumikan kay kadaghanan sa mga SK-chairman dinhi sa dakbayan ang epektibo man sa ilang gimbuhaton ug pagtungha.

Samtang alang kang Bise Mayor Michael Rama dili angay'ng ikatingala ang maong panghitabo gumikan kay seryoso ang suliran sa gidiling drugas dili lang dinhi sa Sugbo.

Gihulagway sa bise mayor nga sayon ra kaayo matintal ang mga batan-on pagpakabuang sa maong bisyo tungod sa kalinghod pa sa ilang panghunahuna nga nagkinahanglan pa og giya sa ilang tagsa tagsa ka ginikanan.

Gipasalig hinuon ni Pesquera nga mangita og paagi ang CCYDC nga katabangan nga ma-rehabilitate ug malikay sa gidiling drugas kadtong mga SK chairman ug SK councilors nga nagumon sa pagbisyo sa gidiling drugas.