Dili na grabe ang drugas sa Ermita — Rupinta

Mireklamo si Ermita barangay Kapitan Felicisimo Rupinta nga dili na grabe ang problema sa drugas diha sa iyang barangay sukwahi sa mga nanggawas nga mga balita.

Matud pa sa kapitan sukad niadtong tuig 1997 dunay 166 ka mga drug personalities ang iyang barangay apan naanam na kini og kadakpan ug karon base sa iyang nahibaw-an tulo nalang ang namaligya ug padayon na nilang gipangita.

Apan si Criminal Investigation and Intelligence Branch Chief Pablo Labra sa iyang bahin mitug-an sa mga tigbalita nga dili pa hingpit nga napapas ang drug problem sa Ermita.

"As far as I know wala pa matangtang ang Ermita sa listahan sa mga heavily drug infested nga barangay sa dakbayan," asoy pang Labra.

Niadtong milabay'ng Domingo sa gabii, mismong ang Sangguniang Kabataan chairman nga si Carlo Magno Tude, 21, nadakpan uban sa ilang 14 anyos nga katabang human mapaliti og drugas sa mga sakop sa CIIB.

Niadto pang Biyernes sa gabii, sumala pa ni SPO1 Filomeno Mendaros sa CIIB kinsa maoy nangulo pagdakop kang Tude nga nakapalit na sila og shabu kang Tude isip 'test buy.'

Tuyo gyud unta sa CIIB mao ang inahan ni Tude nga si Pacita alyas Bebot kinsa nabaniog na kaayo kaniadto pa nga mamaligyaay og shabu sa maong barangay.

Si Rupinta nagkanayon nga ikapasalig niyang wala gyud malambigit si Carlo Magno sa drugas sanglit usa kini ka maayong tinun-an sa kolehiyo ug maayong lider sa kabataan sa ilang barangay.

Si Tude ug ang 14 anyos nga dalagita gikatahong nakigtransaksyon sa kapolisan niadtong Domingo sa gabii diha mismo sa ilang tindahan diin sila madakpi, ang duha gipasakaan na og kaso lakip na ang linaing kaso batok kang Tude ngadto sa Ombudsman for the Visayas.