Si Bise Mayor Michael Rama nga maoy presiding officer sa konseho sa dakbayan nagpaabot nga ugmang adlawa, si Konsehal Sylvan Jakosalem mopadangat og resolusyon aron mopadayag na sijlang mga konsehal sa ilang baruganan sa maong isyu.
Si Jakosalem maoy miawhag sa pagpahigayon og public hearing kabahin sa isyu nga pagpalit og tubig sa MCWD nga adto kuhaon sa Carmen.
Wala dayon makapadayag sa ilang baruganan ang mga konsehal sanglit sa pagpadayon sa public hearing kagahapon sa hapon, pipila na lang ka konsehal ang mitunga pagbalik aron pagpaminaw sa argumento sa duha ka parties.
Apan gitataw ni Rama nga kun mopagawas na og baruganan ang konseho sa dakbayan, iyang gipaneguro nga alang kini sa kaayuhan sa kadaghanan.
Gipasabot ni Rama nga kinahanglan nga ang presyo unya sa tubig nga mapalit sa MCWD gikan sa mga pribadong contractor, sama sa Ayala Stateland Consortium, barato gyo'd nga dili kaayo bug-at sa bulsa sa mga kabus.
Sa miaging adlaw ang mga representante sa Ayala Stateland Consortium nga mitambong sa public hearing miingon nga dako ang kahigayonan nga mapakubsan pa nila ang kantidad nga ilang gitanyag nga tag P25.55 matag metro kubiko.
Ang pagkuha og tubig gikan sa Carmen nahukman tungod kay base sa pagtuon, makasinati ang Sugbo og problema kun ang dugang panginahanglan sa tubig anha kuhaon sa mga tinubdan ilawom sa yuta.
Kini maoy rason nga ang kuhaan sa tubig nga giplanong paliton sa MCWD mao ang dakong sapa sa Luyang, Carmen.