Simbahan mitingog na bahin sa bulk water project

Nanginlabot na ang simbahan kabahin niining nagka grabe nga kontrobersya sa pag-suplay og tubig sa Ayala Stateland Consortium ngadto sa Metropolitan Cebu Water District (MCWD).

Si Msgr. Achilles Dakay, tigpamaba sa Artsidyosesis sa Sugbo mipadayag atol sa public hearing nga gipatawag sa konseho sa siyudad sa Sugbo kagahapon nga wala na sila malipay niining maong kontrobersya nga naka-apektar sa panginahanglan sa publiko.

MatUd ni Dakay gisugo siya ni Arsobispo Ricardo Cardinal Vidal nga mopagawas sa opisyal nga baruganan niining maong isyu.

Wala hinuon mopadayag ang simbahan kun si kinsa tali nila ni Mayor Tomas Osmeña ug sa Ayala Stateland Consortium ang ilang gipaburan apan gipahimangnuanan ang MCWD nga siguradohong makahimo nga makapaangay og mas barato ug limpyo nga tubig mainom sa mga konsumidor.

Samtang si Konsehal Isabelo Apor sa Carmen nga mitambong sab sa maong public hearing mitug-an nga nalipay siya og dako nga adto kuha-on sa ilang lugar sa Luyang river ang dugang suplay sa tubig alang sa Metro Cebu.

Apan gipadayag ni Apor nga iyang hinayhinay nga namatikdan nga nahimutang sa apiki ang ilang lungsod kun matigayon ang maong transaksyon.

Gitumbok ni Apor ang gidemanda nga P200 milyones nga refund sa development cost sa Ayala ngadto sa challenger nga modaug unya sa bidding tungod kay matud niya wala pa silay nakitang development sa Luyang river nga maoy kuha-an unya sa suplay sa tubig.

Ubos usab sa kasabutan tali sa munisipalidad sa Carmen ug Ayala mobayad lang kini og 30 sentimos nga buhis apan mipasalig nga mohatag og mga proyekto sa maong lungsod.

Apil na niini ang usa ka milyon ka pesos nga gipasalig sa Ayala ngadto sa lungsod sa Carmen alang sa rehabilitasyon sa plaza niini.

Samtang gibutyag ni Ben Velasco, project manager sa Ayala Stateland Consortium nga gawas sa mga proyekto nga ilang gisaad sa maong lungsod mahimong inila sa tibuok Pilipinas ang lungsod sa Carmen tungod sa maong proyekto.

Apil sa gisaad sa Ayala mao ang pagtabang sa lungsod sa Carmen nga ma-rehabilitate ang water system niini kun matuman ang P2 bilyones Carmen bulk water deal.