P400 mil danyos sa sunog

Mga P400 mil ang danyos nga gibilin sa sunog nga nahitabo didto sa Maribago, Lapu-Lapu kagahapon sa buntag.

Ang naugdaw mao ang panimalay nga gipanag-iya ni Silverio Agusto. Lakip sa nasunog mao ang puwesto nga giabangan atubangan sa iyang panimalay nga mao ang S&N native products nga gipanag-iya ni Nestor Fian ug Lelen video rental nga gipanag-iya ni Cinen Tagle ug ang Silvas Guitar nga gipanag-iya sa mga Agusto.

Matud pa ni SFO1 Diomed Alburo sa Lapu-Lapu City Fire Department nga base sa ilang imbestigasyon, electrical short circuit ang hinungdan sa sunog nga didto magsugod sa altar niini nga adunay candle light.

Matud pa ni Agusto nga samtang siya nagtan-aw og TV kalit lang misinggit ang iyang apo og 'tabang' gumikan kay dako na kaayo ang kalayo sa ilang ikaduhang andana.

Wala na matabang ang kalayo hinungdan sa pagka-ugdaw sa panimalay niini lakip na ang mga giabangan nga mga puwesto, hinuon walay gikatahong nasamdan atol sa maong panghitabo.

Matud pa ni SFO1 Alburo nga mokabat lamang sa P44 mil ang danyos sa maong sunog gumikan kay ginama lamang sa mga light materials ang panimalay. Ang nakadako mao ang mga baligya ug mga butang sa tulo ka establisamento nga nag-abang sa puwesto sa mga Agusto.