Ang nagtingkagol karon sa karsel sa kapolisan giilang si Carlo Magno Tude, 21, residente sa maong barangay ingon man ang 14 anyos nilang katabang sa tindahan.
Matud pang SPO1 Filomino Mendaros sa CIIB nga niadto pang milabay'ng Biyernes mihimo na og "test buy" ang CIIB diin nakapalit ang ilang asset og usa ka paketeng shabu gikan kang Tude.
Atol sa pagronda, si PO2 Joel Cunan uban sa usa ka asset mipalit og usa ka paketeng shabu balor og P200 nila ni Tude diin gikatahong ang menor de edad nga tindera maoy midawat sa bayad ug gipasa ngadto kang Tude kinsa mao usab ang mibutang sa kwarta diha sa ilang sudlanan, samtang ang menor maoy mikuha sa shabu diha sa gibutangan usab og kwarta.
Nianang gidakop ang duha, nadiskubrehan nga diha sa butanganan og kwarta dunay walo pa ka paketeng may sulod nga gidudahang shabu nga nakit-an sa mga polis.
Dihang dad-on na ang mga suspek, ang mga silingan ni Tude gikatahong nanglabay og botelya sa beer ngadto sa mga polis samtang ang uban misuway og dasmag kanila hinungdan nga mipabuto og armas si Cunan.
Matud pang Mendaros ang orihinal nga ilang target mao ang inahan ni Tude nga si Bebot kinsa gikatahong level two drug pusher sa maong barangay.
Niadtong Agosto 1 ning tuiga, gi-buy bust gihapon sa CIIB si Bebot Tude apan human mapaliti og usa ka paketeng shabu, gidumog sa mga tawo ang grupo nila ni PO3 Cesar Pandong hinungdan nga nakaikyas kini.
Giingong apil sa midumog sa mga polis niadtong tungura mao si Carlo Magno Tude kinsa gikatahong giapil og kiha sa mga polis tungod sa obstruction of justice samtang gikiha usab og pagpamaligya'g shabu ang inahan niini.
Si Carlo Magno dihang gihinabi sa Banat News kusganong mihimakak sa pasangil nga nagbaligya siya og shabu, matud pa niya nga gikuyugan lang niya ang ilang katabang diha sa CCPO apan nahibulong nalang siya nga giapil siya og dakop sa mga polis.
Samtang sa laing bahin, sumala pang Mendaros nga gihulga ni Bebot ang menor de edad nga katabang nga palayason kun dili mobaligya og shabu, kini dihang ang bata midumili pagdawat sa mga pinaketeng shabu nga ipabaligya diha sa ilang tindahan.