21 anyos gipusil samtang naglakaw

Usa ka 21 anyos nga lalaki gipusil patay sa wala mailhing lalaki samtang naglakaw paingon sa ilang pinuy-anan subay sa daplin sa sapa niadtong Biyernes sa udto didto sa Sitio Hamindangan, Tagbobunga, Asturias.

Ang namatay dihadiha mao si Jeprey Saga Casas, ulitawo, laborer ug nagpuyo sa nahisgutang dapit.

Usa ka wala mailhing lalaki miatang sa biktima gituohang maoy mipusil patay gamit ang wala pa matinong kalibre sa armas.

Si Casas nakaangkon og duha ka samad pinusilan sa iyang lawas ug tuong tampihak sa ulo.

Si PO2 Philip Acaso sa Asturias nga nahinabi sa Banat News kagahapon nagkanayon ang biktima padulong na pauli sa ilang pinuy-anan.

Samtang naglakaw kini subay sa daplin sa sapa ang kalit lang gipusil sa wala mailhing mamumuno hinungdan sa hinanaling kamatayon niini.

Matud ni PO2 Acaso nga posibleng may kalambigitan sa yuta ang motibo sa kamatayon sa biktima ug ang ikaduha mao ang iyang gidudahang dunay atraso.

Giangkon niya nga sa pagkakaron pabiling blangko ang ilang imbestigasyon tungod kay walay mga testigos nga mipakita sa ilang buhatan aron sa pagbutyag ug pag-ila sa mamumuno sa biktima.