P1.5M cellphones nadala sa mga manglungkabay

Mikabat sa P1.5 milyones nga balor sa mga mahalong cellular phones ang nasakiyo sa mga gituohang manglungkabay nga miigo sa usa ka cellshop kagahapon sa buntag diha sa eskina sa Boromeo ug Colon ning dakbayan.

Ang Hanson Santos General Merchandise nga gipanag-iya ni Hanson Santos, 25, nga taga T.Padilla ning dakbayan gigamitan og bolt cutter aron putlon ang dakong kandado sa roll-up nga pultahan niini diha sa atubangang bahin sa maong establisamento.

Sumala pang SPO3 Genilo Veraque ang imbestigador sa Theft and Robbery Section sa Cebu City Police Office nga ang caretaker sa sikbit nga ahensyang patantuhan nga si Nelson Canastra maoy nakakita og duha ka tawo nianang pagkakaadlawon nga misuway og sulod sa maong tindahan.

Gikatahong gibadlong kini ni Canastra hinungdan nga nanagan ang mga suspek, apan ang gikahibulong sa mga polis kay wala kini motawag og polis human sa maong hitabo.

Nianang pagka-alas 8 sa buntag kagahapon ang tag-iyang si Santos uban sa iyang mga empleyado padulong nang mangabli nakadiskubreng gilungkab na ang maong tindahan.

Nawala ang 632 ka mga unit sa cellular phone nga Nokia ug Sonny Ericson nga nagkalain-lain ang model sumala pa sa tag-iya.

Matud pang Veraque nga gigamitan pa og bara de kabra ang vault sa tindahan aron pagkuha sa mga cellphone diha sa sulod lakip na ang cash nga P830.Wala pay natumbok nga responsable sa maong krimen.