Mag-uuma patay sa pagpamusil

Namatay sa tambalanan ang usa ka mag-uuma kinsa biktima sa pagpamusil sa miaging kaadlawon sa sitio Toril, barangay Korte, lungsod sa Carmen.

Ang namatay mao si Emeliano Mejares, 29 anyos, ulitawo nga taga barangay Sakaon sa nahisgotang lungsod, kinsa gida unta sa Vicente Sotto Memorial Medical Center.

Ang nagpusil mao si Jelasio Puebla Villanueva Jr., 39 anyos, ulitawo ug silingan sa biktima sa maong dapit.

Nasayran sa Banat News kang SP02 Mario Giangan sa kapolisan sa maong lungsod nga nakabsan sa kinabuhi ang biktima samtang giatiman sa mga doktor sa VSMMC.

Matud pa niya nga sila si SP01 Joselito Hupia, P01 Arvin Torreon ug mga sakop sa pamilya sa biktima maoy nagdala sa tambalanan.

Dugang pa ni SP01 Giangan nga si SP01 Danilo Laurento nga maoy imbestigador nga naghimo og pakisusi ang gikatakdang mosang-at og kasong pagpatay batok sa suspetsado.

Si SP01 Giangan miingon nga wala pa gyod masuta sa imbestigasyon ni SP01 Laurente ang hinungdan sa maong pagpamusil ug kini padayon pang himoon ang dugang pakisusi.