Team Carbon motabang pag-andam alang sa Asean summit

Limpyo na ang tibuok palibot sa Carbon area atol unya sa pagpahigayon dinhi sa Sugbo sa 12th Asean Summit karong Disyembre.

Gibutyag ni Erwin Goc-ong chairman sa CEMVEDCO ug miyembro sa Team Carbon nga sentro karon sa ilang gitutokan ang paghawan sa mga stalls sa mga vendors nga nakahatag og kasamok sa sidewalk ingon man ang pag-ayo sa gubaon ug baradong drainage sa maong lugar nga maoy hinungdan sa mga pagbaha panahon sa ting-ulan.

Ang Team Carbon nga gitukod pa sa panahon ni kanhi market administrator Elpedio "Jojo" dela Victoria Jr. gilangkuban kini sa Cebu City United vendors Association (CCUVA), representante sa City Hall, Ermita ug barangay Sto. Niño diin gitumong kini aron pag-atiman sa tanang problema sa Carbon gikan sa kahugaw sa maong dapit ngadto na sa pagpatunhay sa kahusay ug kalinaw.

Kini aron usab mahatagan og proteskyon ang mga kustomer nga mangompra sa maong lugar batukl niadtong mga tawo nga mapahimuslanon sa higayon.

Dunay 22 ka mga volunteer ang Team Carbon nga gitahasan aron motabang sa kapolisan pagpatunhay sa kahusay ug kalinaw sa Carbon Area nga nagdawatan lang og P1,800 pesos nga honorarium matag bulan ug mo-duty og tag tulo ka oras sa matag adlaw.

Gipasaslig ni Goc-ong nga sa pag-abot unya sa Asean Summit husay na ang dagan sa trapiko sa Carbon area.

Pagkakaron gitutokan na usab sa Team Carbon ang pagdasig sa ilang mga kaubanang mga vendors nga moatiman og bayad sa ilang obligasyong buhis.