Cortez ug Solon ipa-ban

Mipadayag si Philippine Reclamation Authority director Elberto "Bert" Emphasis nga pangusgan aron ma-ban sa National Telecommunications Commission ug Kapisanan ng mga Brodkaster ng Pilipinas ang duha ka gipangdakop nga blocktimers nga sila si Rey Cortez ug Lito Solon.

Gihulagway ni Emphasis nga iresponsableng brodkaster ang duha ug gikinahanglang ma-ban na sila sa kahanginan hangtud sa hangtud aron di maguba ang dignidad sa mga sakop sa media sa broadcast.

Niadtong milabay'ng Biyernes sa gabii, si Solon ug Cortez nasulod sa laang sa National Bureau of Investigation 7 atol sa gihimong entrapment kanila diha sa usa ka restaurant dihang giingong gikilkilan siya sa duha og kwarta.

Si Solon gikatahong miduol kang Emphasis ug nangayo og pasaylo niadtong Biyernes human sa ilang pagkadakop apan dili na niya kini mapasaylo tungod kay napasaylo na niya ang duha kaniadto sa unang higayon atubangan mismo sa mga opisyales sa KBP tungod usab sa ilang pagpangomentaryo sa radyo.

Ang duha mopalit og oras sa DyLA ug DyDD alang sa ilang mga programa, apan ang programa sa DyLA kabahin sa illegal drugs matag Lunes ug Miyerkules sa gabii gikuha gikan sa duha subay usab sa hangyo sa tagdumala sa maong sibyaanan ngadto ni Rep. Antonio Cuenco kinsa maoy vice chairman sa House committee on dangerous drugs.

Kasong robbery through extortion ang gikatakdang ipasaka sa NBI batok sa duha ugmang adlawa.

Samtang si KBP-Cebu City chapter chairman Edward Abad mitug-an sa mga tigbalita nga si Cortez ray accredited nga announcer sa KBP samtang si Solon dili.

Misaad si Abad nga makig-alayon siya sa KBP-Manila aron paghimo og linaing imbestigasyon batok sa duha mahitungod sa reklamo ni Emphasis ug kung mapamatud-ang sad-an si Cortez dili na kini tugutang makapanibya.

"Dili gyud makapugong ang KBP kun naay mga brodkasters nga mohimo'g extortion, apan mas labing maayo nga ang management maoy mobantay sa ilang mga magsisibya," asoy pa ni Abad.

Nangangkon si Emphasis nga human madakpi ang duha niadtong Biyernes nagpusok-pusok na ang nadawat niyang text ug tawag sa telepono nga nagpasalamat sa pagpadakop sa duha hinungdan sa pagtuo nga duna pay daghang nabiktima ang duha.

Giawhag karon ni Emphasis ang mga tawong nabiktima sa duha sa pagbutyag sa ilang kasinatian ug pagpasaka usab og kaso.

Gikatahong gibanatan sa duha og komentaryo si Emphasis ug nangayo sila og kwarta bugti sa paghunong na sa pagpangatake.