CICC mahuman lagi sa Oct. 31 - Guanzon

Mahuman na ang Cebu International Convention Center sa Oktobre 31 sumala pa ni Architect Manuel Guanzon.

Gani nagkomedya pa si Guanzon sa dihang nahinabi ning tigbalita sa iyang buhatan nga nabalaka siya nga dili siya katuman sa Nobiyembre 15 nga target gumikan kay mas sayo ang pagkahuman sa proyekto.

Sayo niini si Guanzon nanghagad og pinustaay balor og tunga sa milyon ka pesos niadtong mga nagduda nga dili mahuman ang CICC hangtud sa Asean Summit karong Disyembre 13 ngadto sa 15.

Apan nasayran nga hangtud karon, walay nidawat sa tanyag ni Guanzon.

Matud pa ni Guanzon nga ang nangagi niyang proyekto pulos gyud nahuman sa wala pa ang tagal nga petsa.

Sa Sugbo, ang mga proyekto ni Guanzon naglangkub sa Grand Convention Center, Pag-Ibig Tower, Metro Bank Tower, Robinson's Place, pagpaayo sa Marco Polo Hotel, Banilad Town Center, Parklane Hotel ug Golden Prince residential suites nga hapit nang ablihan.

Gani, sumala pa ni Guanzon nga ang Parklane Hotel, karon pa untang adlawa buksan

Ang maong hotel gigamit na sa pagkakaron human kini buksi niadtong Agosto 19.

Gipahibawo ni Guanzon nga kagahapon nahingpit na ang pagmasa og semento sa tanang flooring sa CICC ug ang buhaton nalang mao ang exterior wallings nga mahuman sulod sa 15 ka adlaw.

Ang tulo ka ektaryang luna sa gawas nga bahin sa CICC dugay rang nahuman apan dili kini makita sa gawas sumala pa ni Guanzon maong nagduda gihapon ang uban sanglit ang makita sa gawas mao man ang labing gamay nga bahin sa proyekto.

Dugang pa ni Guanzon nga ang CICC sugod karon dili na masudlan og tubig sa uwan.