Kampanya vs binastos sa publiko palig-onon

Gihagit ang Cebu City Anti Indecency Board (CAIB) nga doblihon ug palig-onon ang kampanya niini batok sa mga law-ay'ng talan-awon ug pasundayag dinhi sa dakbayan sa Sugbo.

Si Konsehal Arsenio Pacaña mopasar og resolusyon nga mag-awhag sa CAIB nga mangita og mga pamaagi aron maseguro nga dili na masubli ang nahitabo sa usa ka parking area sa usa ka mall dinhi sa dakbayan nga dunay maghinigugmaay ang nasakpang naghilawas sulod sa ilang sakyanan.

Gipasabot sa konsehal nga nadasig siya sa pagpalabang ning maong resolusyon aron mohimo og hugot nga kampanya ang CAIB nga mogukod batok niadtong mga tawo nga responsable sa mga law-ay'ng pasundayag.

Nabalaka ang konsehal nga sundugon unya kini sa uban gumikan kay magtuo unya kini nga gi-tolerate ra sa mga opisyal sa siyudad ang susamang mga buhat ilabi na diha sa mga parking area.

Nasayran nga gibasura sa City Prosecutor's Office ang kasong grave scandal nga gipasaka batok sa maong magtiayon nga nadakpan sa gwardiya nga naghilawas sa ilang sakyanan nga gi-parking sa usa sa mga parking area sa usa ka mall dinhi sa dakbayan tungod sa katarungan nga makonsiderar ra nga extension sa pinuy-anan kun pribadong lugar ang sulod sa sakyanan.

Ang CAIB nga gipangulohan ni Dr. Rene Josef Bullecer kusganon kining migukod batok sa tanang mga law-ay'ng pasundayag ug mga talan-awon dinhi sa dakbayan.

Gani una nang gihulagway sa CAIB nga mikunhod na ngadto sa 80 porsiyento ang problema sa pagkatap sa mga pornographic materials dinhi sa dakbayan gumikan sa subsob nga kampanya niini.