Balay sa abogado gilungkab

Gilungkab sa wala mailhing mga lalaki ang balay sa abogado pinaagi sa pagguba sa bintana ug nakuha ang relo ug kuwarta niadtong Martes sa kaadlawon didto sa Ilaya Dumanjug.

Gitunong gyud sa mga kawatan nga maayong pagkahinanok og katulog ni Atty. Ramon Quirante, biyudo hingkod ang pangidaron ug nagpuyo sa maong dapit.

Nakuha sa wala mailhing mga lalaki mao ang rado nga relo nga nagkantidad og P20 mil ug kuwarta nga mokabat og P31 mil.

Si Police Insp. Juan Casipong, hepe sa Dumanjug nga nahinabi sa Banat News kagahapon sa hapon miingon nga giguba ang bintana nga jalousie sa abogado ug didto miagi ang wala mailhing mga lalaki dayong kuha sa nahisgutang mga butang.

Matud ni P/Insp. Casipong nga dunay fingerprint nga ilang nakuha sa balay ni Atty. Quirante nga posibling pag-ila sa mga tawo nga nisulod sa balay sa abogado.

"Wala pami suspek pero duna tay fingerprint nga nakuha basin mao ni makatabang sa pagsulbad ug pag-ila sa mga tawo nga responsable" dugang asoy ni Casipong sa dihang nahinabi sa Banat News.

Show comments