Cellphone sa polis gikuha's sulugoon

Suluguon sa Fuente Police Station gipasanginlan nangawat og cellphone samtang gi-charge ug gibutang sa lamesa kay naligo ang field training policeman (FTP) nga nadestino ra usab sa maong police station alas 4 sa hapon niadtong Martes.

Segun sa report sa kapolisan giingong hubog sa ilimnong makahubog ang mikawat ug nadakpan mismo sa polis nga maoy tag-iya sa 1100 nga Nokia pila ka minutos ang nakalabay didto sa sulod sa maong presinto

Ang biktima mao si PO1 Ernestine Mandelma gikan sa rehiyon 10 kasamtangan gi-augment dinhi sa Sugbo alang sa umaabot ASEAN Summit karong buwan sa Disyembre

Ang gitumbok nga maoy mikuha giilang si Leo Nadela, 38, ulitawo nagpuyo sa Kinasang-ang, Pardo ning dakbayan.

Si PO1 Shebba Agustine sa Fuente Police Station nga nahinabi sa Banat News miingon nga si PO1 Mandelma naligo niadtong higayona ug iyang gibilin ang cellphone sa lamesa samtang iyang gi-charge.

"Suod naman gud namo na siya diri, moari raman na siya og motabang-tabang, manglimpyo,"dugang asoy ni PO1 Agustine

Apan sa dihang nahuman na siya og kaligo iya na untang kuhan ang cellphone diha sa lamesa apan wala na kini.

Matud ni PO1 Agustine, si Nadela ra ang tawo niadtong higayona ug walay laing gidudahan ang polis nga mao ray mikawat sa iyang cellphone.

Sa dihang girikisa ni PO1 Mandelma si Nadela nasuta nga didto sa iyang posesyon ang cellphone hinungdan nga gidiretso hinuon og paslak sa prisohan.

Sumala pa ni PO1 Agustine nga kagahapon gikatakda nga mopiyansiya ngadto sa korte ang inahan ni Nadela human siya gipasakaan sa polis sa kasong pagpangawat.