Tulisan gipasakay sa drayber sa taksi; pasahero gipatulis

Gitulis sa miaging gabii ang usa ka tawo human ang drayber sa taksi nga giluwanan niini kalit lang mipasakay og tulo ka wala mailhing armadong lalaki.

Nahitabo ang maong pagpanulis alas 9 pasado ang takna sa miaging gabii sa dalan Logarta, Subangdaku, Mandaue.

Ang biktima mao si Jesus Dizon II, 31, minyo nga lumad nga taga Makasandig, Cagayan de Oro.

Ang nahanaw sa biktima nga gisakiyo sa mga tulisan mao ang P33,000 nga salapi, duha ka cellphone nga mokabat sa P41, 200 ang kantidad ug mga alahas sa biktima.

Si Sr. Insp. Edilberto Castañada, hepe sa Presinto 2 sa Subangdaku Police Station nga gikahinabi sa Banat News miingon nga ang biktima gikan sa Grand Majestic.

Ang biktima nagluwan sa taxi kay magpahatod sa Mactan Air Base apan sa ilang paghidangat sa naasoy'ng dapit ang tulo ka suspetsado kalit lang gihunongan sa drayber ug gipasakay niini.

Gitionan ang biktima sa armas dungan ang pagdeklarar nga tulis ug mapugsanong gipangayo ang pitaka ug duha ka mga mahalong cellphone sa biktima.

Human makuha ang salapi ug uban pang mga butang gipatiran pa sa pagkanaug ang biktima ug gipabulhot ang taksi pahilayo sa maong dapit.

Si Sr. Insp. Castañada miingon nga ang biktima napakyas pagkuha sa body number ug plate number sa taksi.