Outpost sa Apas gi-sarisa store na

Gireklamo na usab sa mga konstituwente ang kapitan sa barangay Apas nga si Kapitan Clemente Rosales tungod sa pagpa-abang sa outpost niini sa barangay nga karon gihimo nang carenderia ug sari sari store.

Ang presidente sa kapilya sa Sitio Sto. Niño,barangay Apas nga si Lourdes Balmore pormal nga miduso sa iyang reklamo batok sa kapitan didto mismo sa buhatan ni Mayor Tomas Osmeña niadtong miaging adlaw.

Matud ni Balmore kaniadto pa nila gireklamo ang pagpa-abang sa kapitan sa maong outpost ngadto sa usa ka manindahay og sud-an hinungdan nga nahunong kini kadali human ilang gisumbong ngadto sa mga sakop sa konseho sa barangay.

Apan karong bag-o usa na usab ka Sabeniana Lato ang mi-abang sa maong outpost ug naninda gihapon kini og mga sud-an samtang ang laing katunga sa outpost sa barangay gipa-abangan usab gihapon kini ni Rosales ug gihimo na karung sari-sari store.

Si Konsehal Ramil Ayuman sa Apas maoy mitabang kang Balmore ug mga kauban sa ilang pagsumbong ngadto kang Mayor Tomas Osmeña.

Nahibaw-an usab sa gihimong pakisusi sa Banat News sa buhatan sa City Treasurers Office nga mi-aplay gyud og business permit si Lato nga naninda og pagkaon sa maong outpost apan wala pa kini ka aprobahi tungod kay wala pa kini makakumpleto sa gikinahanglang mga dokumento.

Si Osmeña mipasalig sa pagpapahawa sa maong mga manindahay og pagkaon ingon man sarisari store diha sa maong outpost subay unya sa rekomendasyon sa City Attorney's Office.

Giangkon hinuon sa mayor nga wala pa siya makasiguro kun duna pa siyay gahum pagpahamtang og silot sa kalapasan nga nahimo sa kapitan.

Bugtong gipasalig sa mayor nga gukdon ang kapitan kun mopakita kini og pagsupak sa himuon unyang paghingilin sa maong mga gipa-abang niini diha sa maong outpost.

Gisuwayan unta sa pagkontak sa iyang panimalay ug sa barangay hall sa Apas si Rosales aron kuhaan sa iyang habig apan wala kini diha sa barangay ug bugtong ang secretary niini nga si Emily Solon ang nakatubag kinsa miingon nga si Rosales lamang ang nasayod sa maong isyu.