Cebu City nag-una sa kaso sa dengue

Siyudad sa Sugbo maoy nag-una nga dunay daghang kaso sa dengue sa buwan sa Enero hangtod sa Septiyember 9, ning tuiga sumala pa sa Regional Epidemiology and Surveillance Unit ngadto sa nagkadaiyang ospital dinhi sa Sugbo.

Dunay 1, 284 ka kaso sa dengue ang natala sa RESU 7 ug kasagarang biktima nag-edad lang sa upat ka buwan ngadto sa 68 anyos.

Ang siyudad sa Sugbo mitala og 40 ka biktima nga namatay niining nag -edad sa 1 anyos hangtod sa 5 anyos.

Midugang ang RESU 7 nga mas daghan ang kaso sa Cebu City nga mitala og 32.9% itandi sa ubang lugar sama sa Mandaue City nga 8.4% samtang nagsunod ang Lapu-Lapu City nga 7.2% ka kaso sa dengue.

Si Reynan Cimafranca ang Epidemiologist sa RESU 7 mipahigayon og meeting ngadto sa mga local officials aron palapdan ang kampanya nga "Puksain:Public Enemy 1 Dengue", aron matagaan og igong impormasyon ang mga katawhan kabahin sa maong lamok nga nagdala og sakit nga dengue virus.

Miawhag usab sila ngadto sa Sanguniang Barangay nga mopalusot og usa ka resolosyon nga magtugot sa ilang barangay nga mohimo ug Dengue Task Force sa ilang lugar.

Mihatag usab sila og dugang impormasyon ngadto sa nagkadaiyang eskwelahan dinhi sa siyudad sa pagsumpo sa maong problema.